O Concello de Boiro leva a cabo obras para o acondicionamento do lavadoiro de Comoxo. O alcalde, José Ramón Romero, e o concelleiro de Urbanismo e Obras, Luís Ruiz, visitaron o lugar para coñecer o desenvolvemento das obras.
Segundo indicaron, neste intre estanse a realizar as actuacións previas que contemplan a demolición do alpendre e muros existentes e o desmonte do terreo para a formación da explanación e muros de contención. Posteriormente realizarase o novo lavadoiro e a fonte coa instalación de fontanería, saneamento, pluviais e alumeado; así como a pavimentación de toda a contorna do lavadoiro e o parque infantil.
A actuación completarase coa recolocación dos contedores, a plantación de novas árbores e a instalación do mobiliario urbano como bancos, papeleiras, luminarias ou varandas para a humanización do espazo e lograr unha zona de ocio para a veciñanza.
“Trátase dunha actuación moi demandada pola veciñanza mediante a que se vai humanizar unha zona que é punto neurálxico do lugar de Comoxo”, afirmou Luis Ruiz.
As actuacións, dun importe de 323.194,90 euros, están financiadas pola Deputación da Coruña mediante o POS+ Concellos. O alcalde, José Ramón Romero, agradeceu á Deputación da Coruña polo financiamento destas obras e tamén “á veciñanza que cedeu terreos para que poidamos mellorar esta zona que vai servir de punto de encontro e dinamizador do noso rural”.
