O concello de Boiro vai acoller unha manchea de actividades festivas neste comezo de setembro: un importante número de citas culturais e relixiosas en distintas parroquias organizadas polas comisións de festas.
Durante a fin de semana primeira de setembro celebraranse en Boiro as Festas do Carme de Abanqueiro, que serán os días 4, 5 e 6 de setembro no Bodión con actuacións musicais e a tradicional procesión marítima que está programada para o domingo día 6.
Tamén haberá na fin de semana festa no Castro coa celebración dos festexos na honra da Nosa Señora do Castro. Haberá actividade para todos os públicos os días 4, 5, 6, 7 e 8 de setembro. Xunto coas Festas do Castro, no Cabo da Cruz terá lugar o 5º encontro de embarcacións tradicionais Mar de Cabo.
O sábado 5 de setembro terá lugar tamén no Campo de San Roque unha nova edición do Encontro Tradicional de San Roque, en Cespón, que inclúe (entre outras moitas cousas) música e baile tradicionais galegos, un mercado de artesanía, gastronomía, xogos tradicionais e obradoiros.
