O Auditorio Municipal acolleu un encontro solidario promovido polo IDIS, a USC e a SEEDO para recadar fondos destinados á investigación desta patoloxía crónica.
O Auditorio Municipal de Ribeira acolleu este venres a I Gala Benéfica a Favor da Investigación en Obesidade, un evento solidario organizado por investigadoras do Instituto de Investigación Sanitaria de Santiago de Compostela (IDIS) e da Universidade de Santiago de Compostela (USC), en colaboración coa Sociedade Española de Obesidade (SEEDO) e o Concello de Ribeira. A cita tivo como obxectivo recadar fondos para proxectos científicos galegos centrados nos mecanismos metabólicos desta enfermidade crónica.
A conselleira do Mar, Marta Villaverde, e o director xeral de Atención Primaria e Comunitaria do Sergas, Salvador Mariño-Ageitos, participaron no encontro en representación do Goberno galego. Desde a Consellería do Mar incidiuse na relevancia dos peixes e mariscos dentro dos hábitos de vida saudables, destacando o valor da dieta atlántica polas súas achegas esenciais, como os ácidos graxos omega-3 e as proteínas de alto valor biolóxico.
A xornada contou coa intervención dos divulgadores Boticaria García e Javier Butragueño, xunto coas investigadoras Ana Belén Crujeiras, Luisa M. Seoane, María Pardo e Sulay Tovar, quen abordaron a prevención e o tratamento da obesidade desde o prisma científico e a divulgación comunitaria.
