A conselleira do Mar, Marta Villaverde, deu a coñecer na Casa de Galicia este rexistro e as Áreas Nai, dúas ferramentas enmarcadas no Plan da Cultura Marítima de Galicia.
A conselleira do Mar, Marta Villaverde, presentou hoxe na Casa de Galicia en Madrid o primeiro Censo do Patrimonio Marítimo Inmoble de Galicia e as Áreas Nai ou Espazos de Interese Cultural Marítimo. O acto, celebrado baixo o título Galicia, mar e memoria, serviu para expoñer estas dúas ferramentas impulsadas pola Xunta no marco do Plan da Cultura Marítima de Galicia (PCUMA), deseñadas para conservar, protexer e difundir o legado vinculado ao mar.
O novo censo recolle un total de 1.452 bens patrimoniais inventariados e documentados. A súa elaboración requiriu un traballo de campo de case tres anos, período no que se percorreron máis de 24.000 quilómetros polo territorio e no que se lograron identificar 83 tipoloxías patrimoniais distintas.
Durante a súa intervención, Villaverde salientou que ambas as iniciativas permiten avanzar na posta en valor dunha cultura marítima que constitúe unha parte esencial da identidade galega. Segundo explicou a titular de Mar, estes instrumentos facilitarán tanto a protección e o estudo dos elementos catalogados como a súa divulgación dentro e fóra da comunidade, ao tempo que reafirmou o compromiso do Goberno autonómico de continuar recuperando, preservando e dando visibilidade ao patrimonio marítimo galego.
