A CIC emitiu un comunicado no que asegura que a empresa Monbus, a nova adxudicataria do transporte escolar na zona da Barbanza, “incumpre a obriga de subrogar todo o persoal que viña facendo desde sempre o servizo nas liñas escolares en Ribeira e A Pobra do Caramiñal”.
O sindicato galego di que se trata de persoal fixo-discontínuo que tiña que ser chamado a incorporarse ao seu traballo co inicio do curso escolar o día 9 de setembro. Neste punto, a CIG asegura ter constancia “dunhas 10 persoas afectadas entre acompañantes e condutores, todas procedentes do Grupo de Empresas Ferrin, aínda que é posíbel que haxa máis”, declarou a CIG hoxe en rolda de prensa, coa presenza do persoal afectado, na que engadiu que “desde o día 9 tiñan que estar de alta na Seguridade Social da empresa, e aínda a data de hoxe iso non aconteceu”, manifestaron dende o sindicato.
Fran Rei, secretario da U.L. As Rias, declarou que “a CIG non vai permanecer cos brazos caídos e xa se están a dar pasos para pedir responsabilidades e facer cumprir a subrrogación, pois a Xunta non debe permitir esta situación e debe obrigar a Monbus a respectar os dereitos dos seus empregados e empregadas, e mais cando de trata dun servizo publico, pagado con cartos de todos e todas. Non descartamos mobilizacións se non somos atendidos”.
Pola súa banda, Francisco Domínguez, traballador afectado, manifestou que “levo máis de 30 anos neste servizo, igual que moitos compañeiros e compañeiras e sempre fomos chamados co inicio do curso, polo que non se entende que Monbus queira desfacerse de nós”. A maiores, dixo, “estanse dando episodios caóticos na implementación do servizo: paradas que non se fan, chegadas tarde aos colexios e as paradas, etc”.
Pola súa banda, a monitoria Melina Santamaria, que si foi subrogada e empezou traballar o día 9 de setembro (dada alta con data do 11 de setembro), comentou que lle falta información sobre a ruta que lle corresponde nin dispón aínda do listado do alumnado que colle o transporte.
Así mesmo están solicitadas desde a CIG sendas reunións cos Concellos de Ribeira e Pobra para tratar a situación que está dando co transporte escolar. “Temos coñecemento de que a Xunta sabe dos problemas, xa que as ANPAs e as direccións dos centros afectados xa foron comunicando a situación desde o primeiro día”, engadiron.
