A Asociación Etnolóxica Alfonso Daniel Manuel Rodríguez Castelao mantivo un encontro institucional na sede do Arcebispado de Santiago de Compostela co presidente da Comisión Diocesana de Arte Sacro, Pablo Carou Barros, co gallo de abrir vías de colaboración que permitan protexer, restaurar e divulgar diversos bens culturais e relixiosos do municipio rianxeiro.
Á xuntanza asistiron o presidente da entidade, Xosé Bravo, xunto co secretario Xusto Ordóñez e os vogais Joaquín Domínguez e Ramón Dios, quen expuxeron a necesidade de impulsar futuros convenios a varias bandas entre a Igrexa, a propia asociación e o Concello de Rianxo para garantir unha xestión patrimonial eficaz con especial fincapé no seu valor formativo para a mocidade
Durante a xuntanza presentáronse dous proxectos específicos acompañados de planos e orzamentos, centrados na posta en valor do monumental hórreo do Araño situado no lugar de Traba para asegurar o coidado da súa contorna e rematar co peche continuado da leira que impide a súa visita pública, así como no estudo do estado administrativo e arquitectónico da capela de San Mamede de Guixar no lugar de Campelo de cara á súa posible rehabilitación
A asociación cualificou de xeito moi positivo este achegamento inicial coa autoridade eclesiástica para solicitar os permisos pertinentes e continuar recadando os apoios técnicos e económicos precisos para facer accesibles estes sinais de identidade á cidadanía rianxeira
