Este sábado 8 de agosto será un sábado especial en Noia: unha noite de actividades culturais e de lecer que permitirán a veciños e visitantes desfrutar ao máximo do rico patrimonio do centro histórico. Estamos a falar da actividade Noia na Noite, que, en palabras da Área de Cultura do Concello, “xorde para convidarnos a mirar a nosa vila doutra maneira: con máis calma, con curiosidade e deixando que cada recuncho nos sorprenda”.
O programa comeza polo serán, ás 20.30 horas, con teatro infantil de ÑiquiÑaque no Campo da Feira.
Ás 21.00 haberá un concerto na praza do Curro con Sara & Majos.
Ás 23.00 horas celebrarase unha visita teatralizada polo centro histórico de Noia con Serafín Marcos.
Ás 23.15 celebrarase outro concerto, desta volta na rúa da Peregrina, a cargo de Glasgow 15.
Ademais, ata as 21.15 a asociación empresarial Noia Histórica e os seus establecementos ofrecerán organizarán un gran evento comercial na Alameda.
Ás 0.00 celebrarase unha Noite de Velas no claustro do Concello, na praza dos Franciscanos e en Santa María A Nova.
De xeito paralelo desenvolverase unha xornada de portas abertas ata a medianoite (dende as 21.30) nos museos locais: o Museo do Mar e o Museo das Laudas.
