A conselleira de Política Social e Igualdade, Fabiola García, acompañada do alcalde de Outes, Francisco Calo, e do presidente da Asociación de Discapacitados da Bisbarra de Muros (ADISBISMUR), Ramón Sestayo, visitou este sábado 1 de agosto as obras da que será a nova residencia para persoas con discapacidade de Outes, na que a Xunta inviste 2 millóns de euros e que será xestionada pola entidade social.
Durante o acto, Fabiola García destacou que este investimento do Goberno galego está permitindo transformar o antigo colexio do Cruceiro de Roo, cedido polo Concello de Outes, nun centro residencial que contará con 24 prazas. Ademais, puxo en valor a traxectoria da entidade social, “con máis de 40 anos axudando a sentar as bases do que hoxe é a atención ás persoas con discapacidade”.
A futura residencia completará a rede de servizos de ADISBISMUR da que xa forman parte un centro ocupacional, con capacidade para medio cento de usuarios, e un centro de día que presta atención a unha vintena de persoas. Nestes centros a Xunta financia 49 prazas, ás que destina 720.000 euros anuais.
