- A primeira xornada da Mar de Fisterra navegouse entre brisas e ventolinas cun vento do suroeste de 6 nós de media.
- Os Open completarán este domingo outra proba costeira e os ORC disputarán dous bastóns ao vento tipo barlovento-sotavento máis técnicos.
As brisas e ventolinas do suroeste marcaron o ritmo na primeira xornada da Regata Mar de Fisterra – Trofeo Pitusa Sabín, organizada este fin de semana polo Real Club Náutico Portosín.
Ante a previsión de vento frouxo, o Comité de Regatas optou por acurtar o percorrido dos ORC ata o Carrumeiro Chico, nos baixos de Miñarzos, evitando así posibles pozos sen vento e sen chegar a entrar na ría de Corcubión. A proba costeira completouse finalmente sobre un trazado de 20,64 millas náuticas (arredor de 38 km).
Clasificacións provisionais por clases
- División Regata (ORC): O Bon III, de Víctor Carrión (CN Punta Lagoa), fíxose co liderado da categoría e da clasificación xeral. A segunda praza provisional é para o veleiro da Armada Española patroneado por Diego López (Comisión Naval de Regatas de Ferrol), mentres que o Sara 3.0, de Rafael Blanco (MRCY Baiona), ocupa o terceiro posto.
- División驳 Cruceiro/Regata: Manda o Orión, de Javier Pérez (MRCY Baiona), seguido polo Ziralla Primero, de Ramón Barreiro (RCN Sanxenxo), na segunda posición, e o Deep Blue 2.1, de Vicente Cid (RCN Vigo), no terceiro caixón provisional.
- Clase Open: Cunha costeira polo interior da ría de Muros e Noia de 8,63 millas náuticas (case 16 km), o dominio foi local para o RCN Portosín. O Dracco, de Pablo Oliver, sitúase líder, seguido polo Totem II, de Felipe Calle, e o Monte Ulía, de Eduardo Arán.
A competición remata este domingo coa saída programada ás 11:00 horas: a clase Open afrontará unha nova costeira pola ría, mentres que a frota ORC disputará dúas probas técnicas tipo barlovento-sotavento.
