O presidente da Xunta, Alfonso Rueda, destacou este martes 14 de xullo que “Galicia vén de acadar os 40.000 beneficiarios do Bono Coidado no Fogar”, unha medida pioneira posta en marcha pola Xunta e única en España que sitúa a Galicia como un referente na atención á dependencia, e resaltou que desde o Goberno galego “queremos seguir coidando a xente que necesita coidados da mellor maneira, como merecen, e dunha maneira responsable”, sinalou logo de visitar no seu domicilio do concello do Porto do Son ao beneficiario número 40.000 desta axuda universal, que permite que as persoas dependentes poidan recibir coidados no seu fogar. O obxectivo, como indicou o presidente, “é chegar a 50.000 beneficiarios antes do final da lexislatura”.
A Xunta impulsou esta axuda pioneira no 2024 para facilitar a atención das persoas dependentes na súa contorna, podendo ser atendidas polos seus achegados. Deste xeito, concédeselles de xeito universal, con independencia do nivel de renda e grao de dependencia, unha achega económica de 5.000 euros ao ano.
Rueda lembrou que “esta medida forma parte do compromiso da Xunta coa atención á dependencia e cun modelo de coidados centrado na liberdade e que facilita que os maiores poidan escoller onde e como ser coidados”. Destacou tamén que Galicia “é unha das comunidades autónomas líderes na ratio de atención, con máis de 97.000 persoas recibindo algún servizo ou prestación”. E engadiu: “Queremos seguir axudando aos dependentes e ás súas familias; necesítano, é a nosa obriga”, rematou o presidente.
