Esta área estará operativa todo o ano.
Na senda de favorecer o estacionamento para evitar a conxestión de vehículos en determinadas zonas do municipio, que se agudiza durante o verán nas proximidades ao litoral, o Concello de Ribeira habilita un aparcamento disuasorio na zona dos Mosqueiros, na parroquia de Castiñeiras, que estará en funcionamento nos vindoiros días.
Para a materialización desta medida, a Administración local ribeirense alugou unha finca de máis de 2.000 metros cadrados para proceder coa súa adecuación, nivelado do terreo e acondicionamento da entrada.
Trátase dunha área que estará operativa todo o ano para así poñer a disposición da veciñanza espazos para o estacionamento dos seus turismos como xa se está avaliando noutras parroquias do concello.
O concelleiro de Deportes, Álex Vidal, explica que “damos así resposta a unha necesidade que se intensifica durante o verán, pois cada vez son máis as persoas que visitan o noso municipio durante o verán para, entre outras cousas, desfrutar das nosas praias. Isto supón un maior volume de turismos para estacionar nas zonas próximas á costa, o cal tamén repercute nos nosos veciños e veciñas. Por iso, dende o Concello de Ribeira poñemos en marcha esta medida en Mosqueiros, a cal non só se limita ao verán, senón que estará operativa todo o ano”.
