A fachada do Pazo de Raxoi converterase este venres nun enorme lenzo audiovisual con nove pases de videomapping tras uns fogos sincronizados desde tres puntos da capital.
A Praza do Obradoiro ultima os preparativos para vivir un deses momentos destinados a quedar gravados na retina colectiva da cidade. Con puntualidade case ritual, as Festas do Apóstolo 2026 encaran o seu gran momento culminante cunha aposta que mestura o peso da tradición coa vangarda tecnolóxica máis espectácular: o estreo dun videomapping de gran formato que transformará radicalmente a fachada do Pazo de Raxoi.
A cita ten todos os ingredientes dunha noite meiga contemporánea. Tras a treboada de cor dos tradicionais fogos artificiais, a pedra do pazo do século XVIII cobrará vida a partir da medianoite. En nove pases consecutivos ata as dúas da mañá, o gran público asistirá a un despregamento inmersivo de nove minutos onde a arquitectura do edificio parecerá erguerse, colapsar e mudarse nun gran xoguete dinámico. Muros que se derruban, mecanismos ocultos que botan a andar e a irrupción dunha natureza exuberante fundirase con elementos da tradición galega dende unha ollada vangardista, nun compás perfecto coa música que culminará cun gran espectáculo pirotécnico virtual sobre o propio inmoble.
Esta aposta artística, deseñada por Qatro Gatos e proxectada por Art Music, supuxo un investimento próximo aos 100.000 euros financiados a través do imposto sobre as estancias turísticas. Para quen non poida achegarse nesta primeira xornada, a gran novidade desta edición repetirá a súa maxia as noites do sábado 25 e do domingo 26 de xullo, nun horario de 23:00 a 01:00 horas. A concelleira de Festas, Pilar Lueiro, fixo un chamamento á cidadanía e visitantes para gozar da proposta respectando os fluxos de acceso e as medidas de seguridade nunha praza que se agarda multitudinaria.
Un ceo iluminado desde tres puntos
A experiencia audiovisual no Obradoiro será o broche de ouro a unha noite que arrincará co ceo de Compostela acendido. Ás 23:30 horas chegará outro dos momentos máis agardados: os fogos artificiais do Apóstolo. Tralo éxito da fórmula estreada o pasado ano, a pirotecnia volverá lanzarse de xeito sincronizado desde tres localizacións estratéxicas da capital: a Alameda, a escalinata de Fontiñas no parque Carlomagno e a Cidade da Cultura. Este sistema descentralizado garantirá que miles de compostelanos e visitantes poidan seguir a eclosión de cor e efectos visuais desde case calquera punto da xeografía urbana.
Do son do gaiteiro á forza de Lila Downs
Malia que a noite concentrará as olladas, a atmosfera festiva xa se deixará sentir desde ben cedo na capital galega. A xornada deste venres dará o seu primeiro compás ás 10:00 horas coa alborada da A.C. Pana Raiada, que percorrerá o itinerario entre Pontepedriña e San Fiz de Solovio. Ao mediodía, a tradición máis familiar tomará o centro histórico co encontro de xigantes e cabezudos, que poñerán a nota de cor na Praza da Quintana ás 12:00 horas e na do Toural a partir das 12:30.
O preámbulo musical á noite de luces terá un protagonismo decididamente feminino e internacional. A partir das 21:00 horas, o escenario da Quintana converterase no epicentro sonoro da cidade coas actuacións da recoñecida artista mexicana Lila Downs e da galega Belém Tajes, dous referentes que poñerán a banda sonora previa a unha noite onde Santiago volverá xogar a ser o centro do mundo.
