Este venres 17 de xullo celebrouse en Muros a tradicional homenaxe aos mariñeiros e mariñeiras que se xubilan, organizado pola Confraría de Pescadores, co patrocinio de Almacéns Castillo de Muros.
Nesta ocasión, as homenaxeadas foron as mulleres e homes xubilados do mar nados no ano 1947. Entre elas, sete mulleres mariscadoras.
Na mesa, de esquerda a dereita, o doutor Juan Gestal; a alcaldesa de Muros, María Lago; o patrón maior da Confraría de Muros, Daniel Formoso; a conselleira do Mar, Marta Villaverde, e Marcos Lijó, representante de Almacéns Castillo.
“Hai xa uns aniños que deixastes a vida activa, mais quen foi de mar, éo sempre”, asegurou a rexedora, María Lago, engadindo que “o descanso do mariñeiro, cheo de botes de sétima lista, liñas e polbeiras, cheo que empanada de arolas, arroz de berberechos e fideos con ameixas; un descanso que sabe a fogar, pero que nunca para”.
Ademais, a conselleira do Mar, Marta Villaverde, participou este venres 17 nos actos solemnes organizados en Muros con motivo das festividades na honra da Virxe do Carme. A titular autonómica asistiu ao mediodía ao acto relixioso na Igrexa Parroquial de Muros, unha emotiva cerimonia en memoria dos mariñeiros falecidos no mar, e posteriormente desprazouse ata o edificio da antiga Fábrica de Sel para presidir a XXXIII Homenaxe aos/as xubilados e xubiladas do mar de Muros.
Durante o encontro de recoñecemento, Villaverde enxalzou a fortaleza, dedicación e o legado incalculable dos profesionais que dedicaron a súa vida ao sector marítimo-pesqueiro galego. Ademais, subliñou que estas homenaxes serven para poñer en valor o esforzo de xeracións enteiras que situaron Galicia como referente pesqueira, e reafirmou o compromiso da Xunta para seguir apoiando e garantindo o futuro dun sector que constitúe o motor socioeconómico das comunidades costeiras.
