O Concello de Santiago desvela a última baza do seu cartel festivo: o recoñecido médico, produtor e dinamizador cultural será o encargado de inaugurar as celebracións este mércores dende o balcón consistorial.
A expectación medraba por momentos na capital galega a poucos días de que o son das gaitas e o cheiro a pólvora volvan inundar as rúas. O segredo mellor gardado do Concello de Santiago saíu por fin á luz este mediodía: Ghaleb Jaber Ibrahim será o pregonero das Festas do Apóstolo 2026. Raxoi xogou así a súa última e máis simbólica baza na programación duns festexos que arrincarán de xeito oficial este mesmo mércores, cando o empresario e mecenas se dirixa a toda a cidadanía compostelá.
Coa elección de Jaber Ibrahim, o Concello reafirma unha aposta clara pola identidade plural da capital, sostendo que o seu nome súmase a anteriores pregoeiras de renome como Leilía, Lucía Freitas e Blanca Millán. Con este fito, Santiago volve celebrar «a diversidade» e pon en valor as distintas formas de ser, vivir e sentirse compostelano no século XXI.
Máis de medio século de pegada compostelá
A historia de Ghaleb Jaber coa cidade do Sar comezou en febreiro de 1970, cando un mozo chegou a Compostela coa maleta cargada de soños para cursar os estudos de Medicina. O que parecía unha etapa formativa temporal converteuse nun idilio de máis de cincuenta anos. Na capital galega non só alcanzou o grao de doutor, senón que diversificou a súa actividade converténdose en empresario da hostalería e, de xeito moi destacado, nunha «figura clave» do sector audiovisual do país grazas á creación da produtora CTV.
Con todo, a súa achega máis persoal e transversal reside na súa incansable labor cultural á fronte da Fundación Araguaney-Puente de Culturas. Un proxecto que o propio protagonista definiu hoxe como «unha idea necesaria» nada en 1984 e que, 42 anos despois, mantén intacta a súa vocación de traballar para a sociedade e para as persoas. «É un punto de unión con toda a sociedade compostelana», afirmou con orgullo o que este mércores asumirá o emotivo reto de pregoar as festas grandes da súa cidade de adopción.
A conta atrás para os días grandes
O anuncio pecha o deseño dun cartel que combina tradición, música e encontros na rúa. A cita coas verbas de Ghaleb Jaber Ibrahim marcará o disparo de saída institucional dende o Pazo de Raxoi, nun intre onde a emoción do reencontro e o recoñecemento a unha traxectoria de integración e entrega a Santiago darán por inauguradas, oficialmente, as Festas do Apóstolo 2026.
