Xunto coa mostra, esta semana haberá dous concertos da Orquestra e Coro da Universidade
A Universidade de Santiago de Compostela celebra este ano o centenario da Biblioteca América, unha das coleccións bibliográficas e documentais máis singulares de Europa sobre o continente americano, coa exposición ‘A Biblioteca América: un soño inaugurado en 1926’ que abrirá as súas portas o 23 de xullo nun acto no Salón Nobre do Colexio de Fonseca.
O evento, previsto ás 12.00 horas, estará presidido pola reitora Rosa Crujeiras e nel intervirán ademais o conselleiro de Educación, Ciencia, Universidades e Formación Profesional, Román Rodríguez; a comisaria da exposición, a profesora da USC Pilar Cagiao; a alcaldesa de Santiago de Compostela, Goretti Sanmartín; e a presidenta do Consello da Cultura Galega, Dolores Vilavedra.
O acto contará coa interpretación musical da Orquestra e Coro da Universidade da peza ‘Huarina/Huayño’ de Julio Martínez Arteaga (Bolivia) e rematará con outra intervención conxunta a cargo do Programa Escolas Abertas 2026 da Secretaría Xeral de Emigración e da Orquestra e Coro da Universidade de ‘Libertango’, do arxentino Astor Piazzolla. A continuación terá lugar a visita guiada á exposición que contará coa intervención de Ricardo Busto Lage, neto fundador da Biblioteca América.
Un espazo único
A mostra, que permanecerá aberta en Fonseca ata o 31 de outubro, fai un percorrido pola historia, as persoas e os documentos que fixeron posible a Biblioteca América, un dos espazos bibliográficos máis singulares do patrimonio cultural galego.
Convídase así a un percorrido documental, fotográfico e visual polas súas orixes, evolución e protagonismo histórico desde 1926 ata a actualidade a través de materiais históricos, fondos documentais e testemuños gráficos que permiten comprender o papel da Biblioteca América como referente cultural e académico ao longo dun século.
Concertos
A Orquestra e Coro da Universidade de Santiago de Compostela desenvolve entre o 20 e o 25 de xullo un proxecto educativo que, como ano tras ano, reúne membros da propia formación e estudantes de música con certo nivel académico e profesorado procedente de recoñecidas institucións musicais e formacións profesionais nun encontro orquestral e coral intensivo que inclúe ensaios, actividades formativas e concertos.
Nesta edición, o encontro conta cun marcado carácter patrimonial e cultural ao estar dedicado ao Centenario da Biblioteca América da Universidade de Santiago de Compostela.
Deste xeito, o xoves 23 de xullo, ás 18.00 horas, será o primeiro dos concertos na Igrexa de San Francisco e o venres 24, ás mesma hora, na Igrexa da Nosa Señora da Mercede de Conxo. A dirección musical estará a cargo de Mario Diz, no caso da Orquestra, e de Anna Melikhova, no caso do Coro. Os concertos serán presentados por Nancy Pérez Rey, do Grupo de investigación da USC HistAmérica.
O repertorio, todo con partituras do fondo musical da Biblioteca América, inclúe as pezas Amor bendito: danza para canto y piano, de Juan Ríos Ovalle; Sonrisa de niño: comedia musical, de J. Daniel Zúñiga; La más linda de mi pago: zamba, de Antonio Santos La Salvia; La reina de mis amores: canción criolla para piano y canto, de Alberto S. Poggi; Huarina, huayño: para piano, de Julio Martínez Arteaga; El rancho abandonado: para piano, de Alberto Williams; Tres estrofas de amor: canción para soprano, de Pau Casals; e Danzón n.º 2, de Arturo Márquez.
A entrada aos dous concertos é libre ata completar a capacidade do espazo.
