Nun comunicado a Asociación Amas de Casa e Aires de Dorna de Ribeira desexa trasladar á cidadanía e aos cidadáns a súa profunda decepción pola situación na que se atopa a solicitude presentada para que unha rúa, praza ou calquera outro espazo público do noso municipio leve o nome de Dona Magdalena Bringas, presidenta fundadora da nosa Asociación e Filla Adoptiva de Ribeira.
A asociación lamenta que a proposta para dedicarlle unha rúa ou praza á súa presidenta fundadora siga paralizada tras máis de tres anos de espera.
A Asociación Amas de Casa e Aires de Dde de Ribeira fixo pública a súa “profunda decepción” ante a parálise institucional que sofre a solicitude para que un espazo público do municipio leve o nome de D.ª Madalena Bringas, presidenta fundadora do colectivo e Filla Adoptiva de Ribeira.
A petición foi rexistrada de forma oficial no Concello o 8 de febreiro de 2023. Con todo, a entidade lamenta que, a día de hoxe, a iniciativa aínda non fose elevada ao Pleno da Corporación municipal para o seu debate e aprobación.
Falta de consenso na corporación
Segundo explica a actual xunta directiva da asociación —que conta con máis de 1.100 socias—, mantivéronse múltiples conversas persoais e telefónicas cos distintos grupos políticos para solicitar apoios.
A pesar destes esforzos, o colectivo sinala directamente a falta de respaldo de varias forzas políticas como o motivo do bloqueo:
Así a día de hoxe a iniciativa aínda non foi levada a Pleno, ao non contar cunha resposta favorable por parte dos grupos municipais do BNG e do PSdeG-PSOE, circunstancia á que tamén se suma a falta de apoio do concelleiro non adscrito.
“Cremos que o recoñecemento a persoas que contribuíron de forma extraordinaria ao progreso da nosa vila debería situarse por encima de calquera diferenza política”, manifestan desde a asociación, insistindo en que a petición transcende as siglas dos partidos.
Un legado dedicado a Ribeira
Desde a Asociación Amas de Casa e Aires de Dorna lembran que Madalena Bringas dedicou décadas de traballo desinteresado ao municipio, impulsando de forma pioneira o asociacionismo feminino e promovendo actividades culturais, sociais e educativas. Así mesmo, destacan o seu papel fundamental na exaltación e difusión do baile e a música tradicional galega, uns méritos que no seu día xa a fixeron valedora do título de Filla Adoptiva de Ribeira.
Por todo iso, o colectivo reitera a súa petición ao Concello de Ribeira para que a proposta sexa incluída na orde do día do Pleno municipal. As Amas de Casa confían en que se logre o consenso necesario para “facer xustiza coa memoria e o legado” dunha figura clave na historia social da localidade.
