Activada este sábado a alerta laranxa ante a previsión de intensas tormentas e precipitacións que afectarán principalmente ao noroeste e ao interior da provincia da Coruña.
Segundo os datos facilitados pola Axencia Estatal de Meteoroloxía (Aemet), o aviso activarase a primeira hora da tarde de mañá. Agárdanse treboadas que poderían ir acompañadas de fortes refachos de vento e saraiba, con acumulacións de auga que poden chegar aos 30 mm nunha soa hora.
A xornada do sábado 12 de xullo, San Bieto, comezará nas Rías Baixas con néboas costeiras e as nubes baixas que serán as protagonistas durante as primeiras horas do día, deixando un ambiente húmido e ceos pechados que irán abrindo claros a medida que avance a mañá. Pola contra, nas zonas de interior e en cidades como Santiago de Compostela, os bancos de néboa matinais darán paso rapidamente a unha mañá de ceos alternando nubes e claros.
Tarde de treboadas localmente fortes
O cambio máis brusco chegará a partir do mediodía. A inestabilidade atmosférica provocará o crecemento de nubes de evolución que, de cara á tarde, descargarán chuvascos treboentos. Segundo a previsión, estas tormentas serán de intensidade localmente forte e acompañadas de aparato eléctrico, sendo moito máis probables e intensas nas zonas do centro e norte da comunidade autónoma.
En Santiago, o risco de sufrir un ballón forte a partir do serán é elevado, mentres que nas Rías Baixas o tempo manterase máis estable na franxa costeira, aínda que non se descartan treboadas illadas cara ao interior da provincia de Pontevedra.
Temperaturas suaves e ventos do norte
No tocante aos termómetros, non se agardan grandes cambios. As temperaturas mínimas manteranse sen novidades e as máximas experimentarán un lixeiro ascenso, acadando valores suaves que roldarán os 28°C ou 30°C en Compostela e que poderían rozar os 28°C nos puntos das Rías Baixas onde a néboa teña menor persistencia.
Os ventos soprarán en xeral frouxos de compoñente norte-noroeste en todo o territorio, coa única excepción do norte de Lugo, concretamente na zona de Bares, onde se agardan refachos moderados.
O noso mar: Vento variable á mañá, do oeste á tarde e do sudoeste á noite, forza 1 a 2 á mañá, 1 a 3 á tarde e 2 a 4 á noite. Mar rizado á mañá, mar ovellado á tarde e marusía á noite. Visibilidade mala á mañá e á noite e regular á tarde. Mar de fondo do noroeste, con ondas de 0 a 1 metros á mañá e á noite e 0.5 a 1.5 metros á tarde.
