Foi necesario o paso de 60 anos para acadar que os habitantes da capital de Ribeira carentes de medios de transporte propios poideran desprazarse ata a praia do Vilar na tempada de verán. Esta praia é un dos máis prezados tesouros da contorna ribeirense e tardaron ben de anos en descubrilo. Non foi sen tempo!.
Sesenta anos atrás, os que queriamos achegarnos ao Vilar, Corrubedo, Artes, Olveira, Castiñeiras, xa sabiamos o que nos quedaba se carecías de bicicleta: camiñar quilómetros de ida e volta e soportar temperaturas que, sen chegar a ser tan altas coma as que soportamos estes días en Galicia, chegábanlle ben.
Daquela só había autobuses da Empresa Celta a Santiago e Noia con distintas paradas intermedias, e “o vapor” á illa de Arousa e Vilagarcía. Quedaba, obviamente, o recurso do taxi -moi socorrido para o desprazamento médico a Santiago de Compostela- pero con prezos non sempre asumibles para os usuarios. E estaba tamén o autobús de Sarasquete cos distintos desprazamentos ata A Pobra do Caramiñal e, posteriormente, a Corrubedo. Pero quedaba unha moi ampla zona absolutamente desatendida e que agora, co paso de moitos anos e maior capacidade adquisitiva para dispoñer de vehículo propio, dispón de autobuses con servizos conveniados entre a Xunta e o concello de Ribeira, que ía sendo hora chegaran a se facer realidade.
A propia alcaldesa de Ribeira, María Sampedro, recoñecía expresamente que o acordo eliminaba a utilización do vehículo propio para o desprazamento ás praias da contorna á vez que aquelas persoas que non dispoñan de tal vehículo poidan utilizar o mencionado transporte público.
Unha medida de xustiza para equiparar a uns e outros no uso e desfrute dun servizo ao que todos teemos dereito e cuxa prestación tampouco resultas moi oneroso.
