UCIN Galicia achegou un comunicado no que critica “a falta de mantemento e prevención de incendios en infraestruturas viarias da Xunta” como o corredor Santiago-Noia.
“Desde UCIN Galicia”, sinalan, “queremos manifestar a nosa profunda preocupación polo estado de abandono en materia de mantemento e prevención de incendios en determinadas infraestruturas viarias dependentes da Xunta de Galicia, como a corredor AG/AG-56 (Autovía Santiago–Noia), actualmente en obras”.
O coordinador de UCIN Galicia, José Luis Calo, advirte de que “a falta de actuacións preventivas, limpeza de marxes e mantemento adecuado en zonas sensíbeis supón un risco innecesario en plena época de altas temperaturas e reiterados episodios de incendios na nosa comunidade”. E apunta: “Non hai escusas. Nin as obras nin os prazos poden ser unha coartada para descoidar a seguridade. A prevención de incendios e a protección da contorna deben ser unha prioridade absoluta en calquera actuación pública”,
Por todo iso, UCIN Galicia esixe ao presidente da Xunta, Alfonso Rueda, que “ordene de inmediato unha revisión integral dos protocolos de mantemento e prevención en todas as infraestruturas viarias en execución ou explotación”.
