A declaración como Itinerario Cultural Europeo da Vía Querinissima, percorrido inspirado na viaxe de Pietro Querini e do que forma parte o Camiño de Santiago pola Ría de Muros Noia, comeza a dar os seus froitos. Cando aínda non se cumpriu un mes desde o anuncio realizado polo Consello de Europa, un dos máis prestixiosos turoperadores venecianos visitou estes días o Camiño da Ría de Muros Noia e a Volta de Gloria, itinerario circular que pon en contacto dous Camiños xacobeos: Fisterra-Muxía e o da Ría de Muros Noia.
“A conexión do Camiño de Santiago pola Ría de Muros Noia coa epopeia do navegante veneciano Pietro Querini sitúa a esta ruta xacobea nunha primeira liña internacional grazas ao respaldo do Consello de Europa. A visita de Cammini Atlantici é un importante exemplo diso”, apunta Luís Oujo, presidente da Asociación de Concellos do Camiño de Santiago pola Ría de Muros Noia e da Ría da Estrela.
Flavio Prospero, representante do turoperador Cammini Atlantici, percorreu tanto o Camiño de Santiago da Ría de Muros Noia como a Volta de Gloria para coñecer sobre o terreo os servizos e posibles itinerarios que pode ofrecer aos seus clientes italianos, moi atraídos por todo o relacionado coa viaxe de Pietro Querini e o seu descubrimento do bacallau seco noruegués, que acabaría tendo un enorme impacto no comercio europeo do século XV.
Durante a súa estadía en Galicia, Flavio Prospero estivo acompañado por persoal da Asociación, así como por estreitos colaboradores da entidade como Montse Paris, da Asociación Muros Auga e Sal, e Antón Pombo, autor da guía do Camiño da Ría de Muros Noia. Foron uns días nos que o turoperador veneciano estivo estudando a fondo o terreo, coñecendo as infraestruturas dispoñíbeis e avaliando os servizos que pode ofertar aos seus clientes dunha forma profesional e completamente testada. Isto é así porque un dos piares deste turoperador é que so ofrecen rutas que percorreran e aloxamentos que probaran persoalmente.
Ademais, Prospero tamén percorreu algunhas das paraxes naturais máis atractivas de Galicia na Volta de Gloria, itinerario circular que conecta o Camiño de Fisterra-Muxía co da Ría de Muros Noia. Volta de Gloria preséntase como unha interesante opción para quen desexen alongar a súa visita a Galicia.
Cammini Atlantici
Cammini Atlantici é un turoperador veneciano especializado en rutas de varios días e que está centrado especialmente no Camiño de Santiago, onde ofrece varias rutas personalizadas desde Portugal sen as limitacións de datas de saída de grupos e sen preocuparse pola organización, cun presuposto personalizado para cada experiencia. Para iso encárganse ao completo da organización dos itinerarios e aportan sempre a presenza dun experto coordinador.
O obxectivo, segundo o propio operador, é que o cliente “viva a súa experiencia do Camiño de Santiago de forma tranquila e relaxada, sen ter que preocuparse pola organización e podendo contar sempre co noso apoio, sen renunciar a unha boa doses de aventura. Dado que cremos firmemente na calidade do noso servizo, so ofrecemos rutas probadas, ao largo das cales podemos guiar ao cliente de forma segura e profesional”.
Unha proposta de descubrir o camiño de forma tranquila e relaxada que coincide coa filosofía que inspira tanto ao Camiño da Ría de Muros Noia como á Volta de Gloria. A iso engádese a Vía Querinissima, que sigue o itinerario da viaxe de Pietro Querini en 1431, unha das primeiras peregrinacións documentadas polo Camiño da Ría de Muros Noia e cuxa ruta marítima e terrestre atravesa Creta, as costas de España e Portugal, e despois esténdese por Noruega, Suecia, Inglaterra, Alemaña, Suíza e Austria ata chegar a Venecia.
A Vía Querinissima inspírase nos fondos valores que xurdiron da viaxe de Pietro Querini: o diálogo cultural, o intercambio, a hospitalidade, a memoria compartida, a solidariedade e a cooperación entre os pobos. A ruta baséase na viaxe emprendida por Querini de Creta a Flandes e que acabou converténdose nunha das odiseas marítimas máis emblemáticas do século XV, pasando por Cádiz, Canarias, Lisboa e Muros. Tras múltiples desventuras, como avarías, desvíos forzosos e tormentas, acabaría finalmente nas illas Lofoten, onde descubriría o bacallau seco, que remataría tendo un enorme impacto no comercio europeo da época.
