O comercio tradicional de Boiro será o gran homenaxeado na edición 2026 da revista Folía, a publicación que o Concello edita cada ano con motivo das Festas do Verán e que combina o programa festivo con contidos que poñen en valor a historia e a identidade do municipio.
A presentación da revista tivo lugar este venres no Centro Social de Boiro coa participación do alcalde, José Ramón Romero; da concelleira de Cultura, María Outeiral; e do técnico municipal de Cultura, Alberto García.
Durante o acto, o alcalde destacou o valor documental da publicación. “Esta revista recolle moito máis que o programa das festas, pois tamén garda parte da nosa historia”, sinalou.
Ademais do calendario completo de actividades das Festas do Verán, Folía inclúe artigos de opinión, información comercial e un espazo dedicado ao colectivo homenaxeado. Nesta edición, a revista recoñece o labor dos establecementos históricos de Boiro, negocios familiares que levan xeracións formando parte do tecido económico e social da vila e que, co paso do tempo, se converteron en referentes para varias xeracións de veciños e veciñas.
As Festas do Verán 2026, que se celebrarán do 3 ao 8 de xullo, contarán cun amplo programa de actividades pensado para todos os públicos e idades, consolidándose un ano máis como unha das citas festivas máis importantes do calendario boirense.
