O Arcebispado de Santiago de Compostela e as Fillas da Caridade de San Vicente de Paúl alcanzaron un acordo para o cambio de titularidade do Colexio A Milagrosa – Josefa Sobrido, situado en Oleiros-Ribeira, que pasará a integrarse na Fundación Ultreia, recentemente constituída polo Arcebispado.
Este acordo é froito “dun proceso de diálogo e reflexión compartido entre ambas as institucións”, desenvolvido desde unha vontade común: garantir a continuidade, estabilidade e fortalecemento do proxecto educativo, pastoral e social que o centro educativo vén ofrecendo desde hai máis dun século ao servizo das familias e da sociedade de Oleiros, do concello de Ribeira e da comarca do Barbanza.
Explican que a decisión responde tamén “á realidade actual da Compañía Fillas da Caridade, cuxa escaseza de vocacións provoca a dificultade de substitución”, e nace desde “o compromiso responsábel de asegurar o futuro da obra educativa, preservando a súa identidade, os seus valores e a súa presenza na zona”.
Josefa Sobrido e 100 anos de traballo ininterrompido das Fillas da Caridade
A historia do Colexio está profundamente unida ao legado de dona Josefa Sobrido, cuxa visión e compromiso fixeron posíbel o nacemento desta obra educativa. Desde aquela primeira iniciativa marcada polo desexo de ofrecer unha educación próxima, humana e baseada en valores cristiáns, o centro foi medrando ata converterse nunha referencia educativa e social para Oleiros e a súa contorna. Neste proceso de crecemento e repercusión educativa e social foi clave, segundo recorda ao Arcebispado, “a permanencia e o traballo ininterrompido durante máis de 100 anos das Fillas da Caridade”.
E engaden as Fillas da Caridade: “Desexamos expresar o noso profundo agradecemento a todas as persoas que, ao longo dos anos, formaron parte da historia do colexio: irmás, equipos directivos, profesorado, persoal de administración e servizos, familias, alumnado e comunidade educativa en xeral; grazas á súa dedicación, entrega e compromiso foi posible construír unha obra educativa profundamente arraigada nos valores do Evanxeo, o servizo, a proximidade e a atención ás persoas máis vulnerables”.
De maneira especial, as Fillas da Caridade queren recoñecer o labor e a entrega de “tantas irmás que, xeración tras xeración, dedicaron a súa vida a esta misión educativa e humana, facendo do colexio un espazo de acollida, acompañamento e formación integral para miles de nenos, nenas e familias”.
O Arcebispado de Santiago de Compostela, a través da Fundación Ultreia, asume esta nova etapa “con responsabilidade, ilusión e vocación de continuidade”, segundo fixo saber, engadindo que “garantirase o mantemento do proxecto educativo e pastoral do centro, a estabilidade da comunidade educativa e máis o sostemento tanto da actividade educativa como das instalacións”.
Ambas as institucións comparten ademais “a vontade de preservar o carácter propio do colexio e manter viva unha misión educativa centrada na formación integral da persoa, o acompañamento próximo, a excelencia educativa e o compromiso cos valores humanos e cristiáns”.
Lembran que o colexio desenvolveu historicamente a súa misión educativa baixo o lema Saber máis para servir mellor, unha expresión que resume o espírito co que xeracións de educadores e educadoras entenderon o ensino: formar persoas comprometidas, preparadas e sensibles ás necesidades dos demais.
Tanto o Arcebispado de Santiago de Compostela como as Fillas da Caridade queren trasladar “unha mensaxe de tranquilidade, confianza e esperanza ás familias, profesionais e alumnado, reafirmando que este acordo nace co obxectivo de asegurar a continuidade e sustentabilidade futura dunha obra educativa profundamente vinculada á historia e á vida de Oleiros”.
