A Asociación Ambar e o colectivo Sachos á Rúa celebraron este venres unha xornada ecolóxica e comunitaria no Bosque Comestible de Ribeira con motivo do Día Mundial do Medio Ambiente, unha iniciativa que buscou dar visibilidade e revitalizar este espazo verde de carácter público e colectivo.
A actividade reuniu a numerosas persoas que participaron de forma activa nas tarefas de mantemento e mellora deste enclave natural, convertendo a xornada nun exemplo de colaboración cidadá e compromiso co medio ambiente. Armados con sachos e ferramentas de traballo, os asistentes contribuíron ao coidado do bosque nun ambiente marcado pola convivencia, a aprendizaxe e o respecto pola natureza.
Desde a organización destacaron a importancia de fomentar espazos comunitarios que permitan fortalecer os vínculos entre as persoas e a súa contorna. O Bosque Comestible consolidouse nos últimos anos como un punto de encontro para a veciñanza e como un exemplo de aproveitamento sostible dos recursos naturais.
“Visibilizamos o Bosque Comestible como un espazo marabilloso que é de todas as persoas. Foi un auténtico pracer poder compartir esta xornada en comunidade, dándolle vida a un entorno que sentimos tan noso”, sinalaron desde Ambar.
Ao longo da mañá, os participantes tamén tiveron a oportunidade de coñecer máis de preto a biodiversidade presente neste espazo e reflexionar sobre a importancia de preservar os ecosistemas locais e os espazos compartidos.
A iniciativa contou coa colaboración de Sachos á Rúa, colectivo de referencia na promoción da agricultura sostible e na recuperación do patrimonio natural da comarca, reforzando así a dimensión educativa e ambiental da actividade.
Con esta acción, Ambar e Sachos á Rúa quixeron lembrar que a protección do medio ambiente comeza no ámbito máis próximo, a través de pequenos xestos colectivos que contribúen a construír unha sociedade máis sostible, inclusiva e comprometida coa terra.
