A Libraría Social ULA de Outes organiza (coincidindo coas celebracións de San Xoán esta semana) un roteiro polas herbas de San Xoán, unha actividade encadrada no programa do Café-Conversa de Mulleres.
O roteiro permitirá coñecer diferentes espazos do patrimonio material e inmaterial de Outes dando fin a un curso cheo de aprendizaxes que continuará co inicio do novo curso, á volta do verán. A cita será este sábado 27 de xuño, a partir das 18.30 horas, con punto de encontro fixado na ponte do Ruso.
Recoméndase vir sen colonias nin perfumes para localizar e apreciar mellor o aroma natural das herbas.
As sete herbas máis tradicionais que compoñen o “cacho” ou ramo de San Xoán en Galicia son o fiúncho, o fento macho, a xesta (ou codeso), a malva, o romeu, a herba luísa e a propia herba de San Xoán (hipérico).
Esta tradición milenaria indica que estas plantas aromáticas deben recollerse ao solpor do 23 de xuño, deixarse nun recipiente con auga ao orballo da noite e usarse para lavar a cara á mañá seguinte co fin de purificar a pel, espantar os malos espíritos e atraer a boa sorte.
