Tui acolleu este sábado a segunda proba do Campionato de España Inclusivo de Motonáutica – Grupo Davila cun récord de participación e un alto nivel competitivo. Case unha vintena de pilotos tomaron parte nunha cita que renovou por completo o podio provisional respecto da primeira parada celebrada en Portosín.
Os noieses Pepe Barrio Guldrís e María Barrio Bouzas impuxéronse na clasificación, igualando o primeiro posto acadado en Portosín pola parella viguesa formada por José Luís Fernández e Montserrat Pérez. A segunda posición foi para os tomiñeses Marcos Casaleiro e Alberto Estévez, mentres que o terceiro chanzo do podio quedou tamén en mans de Noia, coa tripulación composta por Marcos Veiga e María Barrio.
A proba desenvolveuse sobre as augas do Miño, na fronteira entre España e Portugal, cun trazado técnico tipo xincana entre boias que puxo a proba a pericia dos participantes e a coordinación cos seus axudantes a bordo. O Interfederado actuou como base operativa en terra nunha xornada marcada pola competición e pola resposta do público.
Na entrega de premios participaron o alcalde de Tui, Enrique Cabaleiro; o concelleiro de Servizos Sociais e Medio Ambiente, Ismael Diz; e o presidente da Real Federación Galega de Motonáutica, Carlos Gago. A seguridade correu a cargo da Comandancia Naval do Miño, en colaboración con Protección Civil de Tui.
A terceira e última proba do campionato disputarase no Liceo Marítimo de Bouzas o 19 de setembro de 2026.
