Afundación (Abanca) organizou este mércores 6 de maio unha nova xornada do programa PLANCTON no Parque Natural Complexo Dunar de Corrubedo, con máis de 30 persoas convocadas a través do voluntariado Actúa intervindo na contorna do dito complexo ambiental.
Grazas ao traballo en común, retiráronse 3.000 exemplares de plantas exóticas invasoras, que a báscula reflectiu como 45 kg aproximadamente. Ademais, os voluntarios e voluntarias apañaron 10 kg de lixo mariño recollido na praia de Ladeira.
Segundo informou Afundación, esta xornada “tivo un importante valor educativo, xa que permitiu ás persoas participantes comprender desde o terreo a problemática do lugar e as solucións que están nas nosas mans”.
A anterior xeira de traballo ambiental de Actúa celebrouse o pasado 10 de abril na mesma contorna.
Retiráronse principalmente plántulas de piñeiro (Pinus sp.). A actuación deseñouse para tratar de poñerlle freo ao seu avance que, de xeito progresivo, estalle a comer terreo á duna e ás especies propias, favorecendo a extensión do bosque e desacelerando a súa mobilidade natural.
Xunto cos piñeiros, tamén se pon o foco noutras especies exóticas invasoras como Conyza sp., a margarida africana Arctotheca calendula e varios pes de áloe.
Esta actividade encádrase no marco de PLANCTON, o Plan de Conservación Territorial impulsado pola Obra Social de Abanca, a través do cal a entidade desenvolve un labor continuo de protección e posta en valor do patrimonio natural galego. A iniciativa lévase a cabo coa colaboración activa do seu voluntariado, que participa en actuacións distribuídas ao longo de distintos puntos da costa de Galicia.
