O PSOE de Rianxo lamentou que o pleno municipal rexeitase debater unha proposta urxente centrada na mellora do estado de varios viais do concello. Segundo explican os socialistas, na última sesión plenaria BNG, PP e o grupo de goberno votaron en contra da urxencia dunha moción que buscaba abordar actuacións prioritarias de asfaltado.
A iniciativa pretendía abrir un debate político sobre a situación de zonas consideradas clave en Rianxo, como o acceso á praia de Tanxil, ao Brea Segade e aos accesos aos campos de fútbol da Lomba. Trátase de espazos cun uso intensivo, especialmente durante os meses de verán e en períodos de elevada actividade deportiva.
Desde o grupo socialista consideran “incomprensible” que non se permitise nin sequera tratar o asunto no pleno, ao entender que afecta directamente á seguridade viaria, á mobilidade da veciñanza e á imaxe do municipio. “O máis grave non é só votar en contra, senón impedir que se fale dun problema evidente que require decisión política e planificación”, sinalan.
Os socialistas destacan ademais que a proposta fora comunicada previamente aos distintos grupos políticos, co obxectivo de facilitar a súa valoración. Neste sentido, cren que a sinxeleza da iniciativa e a urxencia das actuacións facían xustificada a súa tramitación.
O PSOE tamén criticou a falta dun plan de asfaltados público e transparente que permita establecer prioridades. Segundo indican, un concello cun orzamento superior aos 12 millóns de euros debería contar cunha planificación clara para atender necesidades básicas como o mantemento dos viais.
Finalmente, o grupo municipal reiterou o seu compromiso de seguir levando este asunto á axenda política local, ao considerar que a cidadanía non entende as dificultades para abordar cuestións que cualifican de “básicas e necesarias”.O PSOE de Rianxo critica que o pleno rexeite debater unha proposta urxente sobre asfaltados en zonas clave
