O Concello de Ribeira continúa avanzando cara a consecución do selo de Mercado Excelente coa adxudicación para unha mellora da terraza da praza de abastos focalizándose na substitución do chan elevado de madeira, o mantemento do novo firme e as paredes e bancos de madeira da parte alta de dito espazo municipal.
O orzamento de licitación situouse nos 36.300 euros, IVE incluído. A empresa Serdeco Contratas, S.L. resultou a adxudicataria das tres que concorreron ao proceso por contar coa mellor oferta por un importe de 29.830 euros, con impostos, financiado nun 80% a través dunha subvención da Dirección Xeral de Comercio e Consumo por importe total de 137.415,38 euros da cal resultou beneficiaria a Administración local para a mellora do conxunto do mercado municipal. O prazo de execución das obras será de tres meses unha vez formalizado o contrato.
