Dende o Concello de Boiro veñen de anunciar que sacan a licitación a instalación dunha bomba de calor aerotérmica para a Casa Consistorial. Engadir que as ditas actuacións contan co financiamento da Axencia Instituto Enerxético de Galicia.
A finalidade desta achega é mellorar a eficiencia enerxética do sistema de calefacción, optimizando o consumo enerxético e reducindo as emisións contaminantes mediante a incorporación de bombas de calor aire-auga tipo aerotermia que traballarán de maneira conxunta coas caldeiras de gas xa instaladas.
O sistema proxectado vai consistir na instalación de tres bombas de calor aire-auga en configuración de cascada cunha potencia aproximada de 88,7KkW que se integrarán coas dúas caldeiras de gas existentes dando como resultado un sistema híbrido que vai permitir optimizar o rendemento das instalacións térmicas.
A actuación atópase en fase de licitación por un importe de 154.138,44 euros e as empresas interesadas poden presentar as súas ofertas a través da Plataforma de Contratación do Sector Público até o 1 de xuño de 2026.
Para levar a cabo esta actuación o Concello de Boiro conta cunha subvención do INEGA por importe de 114.757,59 euros mediante o Programa de incentivos para a implantación de instalación de enerxías renovábeis térmicas en edificios non residenciais, establecementos e infraestruturas do sector público, no marco do Plan de recuperación, transformación e resiliencia, financiado pola Unión Europea-NextGenerationEU.
