Cáritas Diocesana de Santiago presentou Arredonda, unha nova empresa de inserción sociolaboral que nace co obxectivo de combinar a creación de emprego para persoas en situación ou risco de exclusión coa prevención estrutural de incendios forestais no territorio galego.
Arredonda inicia a súa actividade cunha primeira base operativa no norte da diocese (A Coruña, Betanzos, Eume e Ferroltera) e para constituír nas próximas semanas outra no centro (Santiago, Ordes, Arzúa, Terra de Melide, A Barcala, Xallas, Noia e Muros) e o sur da diocese (O Sar, Barbanza, O Salnés, Caldas, Pontevedra e O Morrazo).
A iniciativa, dada a coñecer en Santiago de Compostela, comezará a súa actividade coa xestión de 120 hectáreas distribuídas en 86 parcelas, con previsión de ampliación progresiva. Arredonda desenvolverá traballos de roza, limpeza de leiras, mantemento de zonas verdes, podas e conservación básica da contorna, adaptados ás necesidades de cada espazo.
O proxecto prevé a creación de 13 postos de traballo durante o seu primeiro ano, dos cales nove estarán destinados a persoas en itinerarios de inserción sociolaboral. Estas persoas recibirán formación e acompañamento co obxectivo de facilitar o seu acceso posterior ao mercado laboral ordinario.
Durante a presentación, responsables da entidade destacaron o carácter integral da iniciativa, que conecta emprego, sustentabilidade ambiental e arraigamento territorial. Neste sentido, subliñaron que o mantemento de parcelas e a xestión de biomasa son elementos clave para reducir o risco e a propagación de incendios, especialmente nun contexto marcado polo abandono do medio rural.
Arredonda contará inicialmente cunha base operativa no norte da diocese —incluíndo comarcas como A Coruña, Betanzos ou Ferrolterra— e prevé estender a súa actividade nas próximas semanas ao centro e sur do territorio, co obxectivo de consolidar tres centros de traballo.
A empresa intégrase na estratexia de economía social impulsada por Cáritas, xunto a iniciativas como Moda Re-, centrada na reutilización e reciclaxe téxtil. Con iso, a organización reforza a súa aposta por modelos que combinan actividade económica, impacto social e desenvolvemento sostible.
Ademais, o proxecto conta co apoio da Xunta de Galicia no ámbito formativo, a través de programas que capacitan ás persoas participantes en tarefas forestais e de mantemento de espazos verdes.
Con Arredonda, Cáritas Diocesana de Santiago dá un paso máis no seu compromiso coa inclusión social e a protección da contorna, promovendo unha solución que busca anticiparse aos incendios mediante o coidado activo do territorio e a xeración de oportunidades laborais no rural galego.
