A Xunta investirá máis de 200.000 euros nun novo pasteiro no concello de Rois, que se executará no monte da Rocha de Ermedelo para dar servizo á comunidade de montes de Albagueira.
A conselleira do Medio Rural, María José Gómez, visitou os terreos xunto coa delegada territorial da Xunta na Coruña, Belén do Campo, e destacou que a actuación permitirá ampliar a base territorial para o gando, favorecer a gandaría extensiva e contribuír á prevención de incendios forestais.
O proxecto ocupará case 16 hectáreas e incluirá traballos de roza, encalado, abonado e sementado, ademais da construción dun peche gandeiro, unha manga de manexo, dous bebedoiros, dous comedeiros, cancelas e un paso canadense.
Este novo pasteiro intégrase no Plan de Pastos de Galicia, a través do cal a Consellería do Medio Rural mobilizou desde 2020 case 2.500 hectáreas mediante 106 pasteiros cun investimento de arredor de 15 millóns de euros. A Xunta prevé seguir impulsando este tipo de infraestruturas ao longo do ano en distintas provincias galegas.
