O Auditorio Municipal de Ribeira acolleu este 6 de maio a Gala do Deporte Barbanza Arousa, un acto no que se recoñeceu aos gañadores e gañadoras das diferentes categorías do Circuíto de Carreiras Barbanza Arousa “Catro Carreiras, Unha Meta”. A cita reuniu a representantes institucionais, clubs deportivos, asociacións e corredores de toda a comarca nunha xornada dedicada a poñer en valor o esforzo, a constancia e o espírito de superación que caracterizan ao deporte popular.
Durante o acto fíxose entrega dos trofeos ás persoas premiadas nas distintas categorías do circuíto, “unha iniciativa deportiva consolidada na comarca e que fomenta a participación e a práctica deportiva nos municipios de Barbanza Arousa”, en palabras da mancomunidade formada polos concellos de Rianxo, Boiro, A Pobra do Caramiñal e Ribeira.
Na súa intervención, o presidente da mancomunidade, José Carlos Vidal (alcalde da Pobra) destacou a importancia do deporte como elemento de unión e cohesión territorial, subliñando ademais o papel que desempeñan os clubs, asociacións e deportistas na dinamización social da comarca.
Así mesmo, púxose en valor a aposta conxunta dos municipios por impulsar actividades deportivas vinculadas ao territorio e ao turismo activo, aproveitando o patrimonio natural e paisaxístico de Barbanza Arousa.
A gala serviu tamén para destacar o compromiso coa sustentabilidade do circuíto, xa que os trofeos entregados foron elaborados con plástico reciclado, unha iniciativa que a organización mantén desde hai varios anos.
O Circuíto de Carreiras Barbanza Arousa “Catro Carreiras, Unha Meta” continúa consolidándose como “unha referencia deportiva na comarca, promovendo hábitos de vida saudábeis e fortalecendo a colaboración entre os municipios participantes”, engadiu a mancomunidade.
