A Deputación da Coruña celebra este sábado 16 de maio en Noia o Día Internacional da Muller no Sector Marítimo na provincia, unha xornada que ten como obxectivo visibilizar e reivindicar o papel das mulleres no conxunto no sector da pesca, o marisqueo e cadea mar-industria.
O acto terá lugar no Coliseo Noela de Noia, en horario de 11:00 a 14:00 horas, e contará coa asistencia do presidente da Deputación, Valentín González Formoso, que clausurará o acto, a deputada de Mar e Medio Rural, Cristina Capelán, o alcalde Noia, Francisco Pérez e presidente de ANMUPESCA, Pilar Otero, así como representantes das mulleres do mar de Galicia.
A xornada está organizada pola Deputación da Coruña e coordinada por ANMUPESCA, nunha aposta conxunta por “recoñecer a contribución decisiva, aínda que moitas veces invisíbel, das mulleres ao sector marítimo-pesqueiro desde unha perspectiva ampla e conectada coa realidade actual do mar”.
Trátase da primeira vez que esta data se conmemora a nivel provincial na Coruña, en palabras da Deputación “un territorio profundamente ligado ao mar e no que a presenza das mulleres resulta decisiva en numerosos ámbitos da actividade pesqueira”.
Segundo o Mapa das Mullres na Pesca elaborado por ANMUPESCA para a Deputación da Coruña co obxectivo de “radiografar” a presenza feminina no sector, máis de 6.000 mulleres desenvolven a súa actividade profesional nos distintos elos da cadea de valor do sector.
Esta cifra, sinala a administración provincial, “dá conta da dimensión económica, social e territorial da súa achega e converte a provincia nun espazo especialmente significativo para acoller unha conmemoración destas características”.
Tras a apertura institucional, a xornada contará cunha mesa redonda titulada Mulleres no mar: pasado, presente e futuro, na que mariscadoras, redeiras, traballadoras da industria transformadora e das confrarías ou investigadoras relacionadas co sector do mar exporán os seus puntos de vista sobre a situación actual e os retos de futuro que a muller ten no mundo do mar e a pesca.
O acto rematará cunha entrega de galardóns na que se recoñecerá a distintas mulleres ou colectivos pola súa traxectoria profesional ou a súa contribución – desde diferentes ámbitos- a visibilizar ás mulleres do mar de Galicia.
