A Área Sanitaria de Santiago de Compostela e Barbanza celebra este martes 5 de maio o Día Mundial da Hixiene de Mans, este ano co lema A acción salva vidas, sumándose así á campaña internacional da Organización Mundial da Saúde.
Dende a Área explican que “a hixiene de mans continúa sendo a medida principal para previr as infeccións relacionadas coa asistencia sanitaria (IRAS) e a proliferación de resistencias antimicrobianas” e que “con esta iniciativa a OMS fai fincapé na necesidade de que os países continúen mellorando en prevención e control de infeccións (PCI)”.
Os centros da área sanitaria compostelá acollen un ano máis múltiples actividades para concienciar da importancia desta medida a profesionais e usuarios. Así, ao longo da mañá deste martes 5, instaláronse mesas informativas para a `promoción da hixiene de mans nas entradas principais dos hospitais da área e nalgún centro de saúde como Servizo de Atención Primaria de Ribeira, dirixidas a informar a toda a poboación que se achegue ata estes centros.
Na maioría deses puntos ofrécese ás persoas que o desexen, por parte do persoal das mesas (profesionais do Servizo e Medicina Preventiva, da subdirección de calidade e de atención primaria) a posibilidade de cotexar o resultado da súa práctica de hixiene de mans, comparando o antes e o despois do lavado. Tamén dispoñen de folletos, petacas de solución alcohólica e outros artigos de promoción da hixiene de mans.
Ao longo da xornada proxéctanse vídeos relacionados en diferentes pantallas dos hospitais da área, salas de espera de pacientes e hospitais de día.
Tamén se organizaron para aos máis cativos actividades lúdicas na aula hospitalaria e escolas infantís de fillos de traballadores.
