Todas as hipóteses seguen abertas no caso do home achado morto no porto de Ribeira, aínda que os indicios recollidos ata o momento levan os investigadores a pensar que puido tratarse dun suicidio. O cadáver apareceu no peirao, mergullado na auga e cunha man encadeada a unha escaleira, nun suceso que mantén aínda moitas incógnitas.
O corpo foi trasladado ao Imelga para a práctica da autopsia e esa mesma noite regresou a un tanatorio da localidade barbanzá. Segundo as previsións iniciais, este mércores pola tarde estaba previsto o traslado dos restos á igrexa parroquial de Xuño, no concello de O Porto do Son, para celebrar o funeral e posterior enterro no cemiterio.
Investigación aberta
A pesar de que o caso presenta elementos pouco habituais, as primeiras pescudas apuntan a que o varón podería ter decidido quitarse a vida. Con todo, as fontes consultadas insisten en que todas as hipóteses seguen sobre a mesa, xa que aínda non se pode descartar que apareza un dato novo que cambie por completo o rumbo da investigación.
A Policía Nacional conseguiu recuperar o teléfono móbil e a carteira da vítima, dous elementos que poden resultar clave para esclarecer os feitos. Ademais, solicitou as imaxes dunha cámara que apuntaba á zona na que apareceu o corpo, aínda que a distancia podería limitar a calidade das gravacións. No punto existen tamén varias cámaras do edificio de Portos de Galicia, pero levan anos sen funcionar.
O delegado do Goberno en Galicia, Pedro Blanco, pediu prudencia ao ser preguntado polo caso nun acto celebrado en Ames. Subliñou que non se descarta «ningunha posibilidade» e reclamou «rigor, prudencia e non aventurarse en nada» ata contar con todos os elementos da investigación.
Por agora, os axentes continúan a recompilar probas e testemuños para reconstruír as últimas horas da vítima e determinar con precisión que ocorreu no porto de Ribeira.
