O Concello de Muros ten listo un proxecto para construír un parque interxeracional na parroquia de Serres, que completará a Aula Sostible de Outeiriños, a antiga escola de Serres. O parque incluirá unha zona de descanso, pista polideportiva, zona de xogos infantil, unha zona biosaudábel e mesas de xogo para todas as idades.
“Será un parque para veciños e veciñas de todas as idades, un espazo para o lecer no que poidan xogar os nenos, facer exercicios as persoas maiores e tamén compartir tempo todos xuntos nas mesas de xogo”, explica a alcaldesa, María Lago, engadindo que o Concello xa presentou o proxecto e solicitou unha subvención con fondos LEADER á Asociación de Desenvolvemento Local Deloa.
Os traballos de recuperación da antiga escola unitaria de Serres para o proxecto da Aula Sostible dos Outeiriños rematarán a curto prazo.
“O inmóbel acollerá un espazo de traballo colaborativo entre distintas entidades, impulsando un programa de educación e sensibilización medio ambiental e do sector pesqueiro”, lembra María Lago.
En concreto, o proxecto divide a antiga escola unitaria en dúas zonas diferenciadas: por un lado, no andar baixo un lugar adicado á recuperación de plásticos, no que o Concello traballará de forma conxunta con ADISBISMUR e a asociación de mulleres do mar. No andar superior do inmóbel haberá un espazo de educación ambiental.
O proxecto ten un orzamento que ronda os 375.000 euros. O Concello de Muros aportou 174.837 euros e recibiu unha axuda do GALP de 198.878 euros.
“A rehabilitación da antiga escola unitaria servirá para dinamizar o tecido asociativo da parroquia de Serres e as actividades da veciñanza”, conclúe a alcaldesa, “polo que agora queremos completar o proxecto co parque interxeracional ao carón do inmóbel”.
