Javi Maneiro, ex-vocalista de Heredeiros da Crus, estará o vindeiro 18 de abril en Boiro, na Pousada da Galiza Imaxinaria, ofrecendo un concerto no que fará repaso da súa carreira en solitario e presentará os novos temas que avanzan o seu novo traballo discográfico, entre os que se atopan A miña mellor versión. A cita será o sábado 18 na Pousada a partir das 22.30 horas (apertura de portas). As entradas poden mercarse a 20 euros (anticipadas) en acantaruxaproducciones.com, A Pousada e a tenda boirense Baldani Concept Store. Tamén poden adquirirse na billeteira o mesmo día do concerto a 25 euros.
Javi Maneiro é natural da Pobra do Caramiñal, mais reside en Ribeira desde hai 25 anos. Coñecido por ser ex-vocalista de bandas como Heredeiros da Crus e Xabón Blue, no 2014 inicia a súa carreira en solitario, unha traxectoria que compaxinou co seu traballo nunha fábrica de conservas. Non 2017 lanza a súa primeiro LP Furtivos e, dous anos despois, o segundo, Acaricia mis arrugas.
Tan só un ano máis tarde, en 2020, publica un disco acústico en formato video-álbum, Palabras dun descoñecido.
En 2021, para celebrar os seus 30 anos na música, comeza a traballar no que foi o seu cuarto disco, Un bonito despertar.
Este ano 2026 Maneiro vén con novos temas trala súa ruptura cos Heredeiros. Por exemplo o tema A miña mellor versión, que, segundo sinala o propio músico, marca unha nova etapa na súa carreira, agora exclusivamente centrada no proxecto “Maneiro”. Producido por Fran Gude e arranxado por Rubén Cores, que ademais gravou guitarras e coros, o tema conta coa colaboración especial de Anxo Pintos á zanfona, percusións e a frauta.
Na composición da letra e música atópase o propio Maneiro, que sinala que A miña mellor versión camiña entre a melodía do pop, a esencia do rock e a musica de raíz tradicional galega.
A miña mellor versión é o primeiro dos sinxelos que irán vendo a luz, e que a finais de ano formarán parte do novo disco de Maneiro
Podemos escoitar o tema en Theorchard.com.
