Irene Miranda, autora teatral de Outes, vai estrear na súa terra o vindeiro 2 de maio a súa nova peza teatral: Festa rachada. Trátase dunha comedia de sketches ambientada na Galicia rural dos anos 90, durante a fin de semana das festas de Vilar de Abaixo. A peza é en palabras de Irene “ unha caricatura dunha aldea galega tan única que podería ser calquera”.
Irene cóntanos tamén que tanto ela como o resto da compañía son artistas galegos residente en Madrid, onde estudan e traballan, pero con esta peza “quixemos volver ás nosas raíces e poñer en valor o noso, cunha mirada que tamén nos gustaría levar a Madrid na próxima tempada”.
“Dende que me fun de Galicia”, explica Irene, “valóroa como nunca antes fixera estando nela. E cousas que me molestaban atópoas divertidas e xenuínas”.
No elenco participan Germán Prenta, Mario Lagoas, Lucas Ares (recentemente no elenco de Salvador en Netflix) e mais a propia Irene Miranda.
Contan ademais coa colaboración do Centro Dramático Galego, que cedeu vestiario, escenografía e parte do atrezzo.
Irene explica que a súa intención foi que a obre constituíse “unha festa e unha celebración” para que todos os paisanos nos poidamos rir do que somos cando nos xuntamos.
Sinopse
Benvidos a Vilar de Abaixo, onde as festas do 95 están a piques de comezar.
Hai unha orquestra de camiño, hai xente nova no pobo e hai un morto, ou dous.
Mentres uns buscan paz, outros procuran conversa e as linguas encárganse de que ningún segredo quede a salvo.
Festa rachada é un retrato ácido do noso costumismo: catro intérpretes poñéndose na pel de toda unha aldea mesturando humor, malicia e ritmo. Rumores, faladurías e pequenas intrigas convértense nun espectáculo vibrante onde cada palabra conta e cada escena respira o pulo dun pobo vivo, tan único que podería ser calquera.
