O grupo Carabela, singular referente da nova música galega, vai ser un grandes protagonistas da edición 2026 das Festas de San Marcos, en Noia. A banda presentará unha actuación especial na súa vila natal o vindeiro 25 de abril ás 22h na praza do Tapal, un concerto pensado como celebración colectiva, no que o conxunto compartirá escenario con outras artistas e músicas noiesas, abrindo o seu repertorio á colaboración e poñendo en valor o talento musical local nunha das datas máis festivas da localidade.
Entre as artistas convidadas atópanse Brais Sánchez (Momboi), Pablo Martínez e Marcos Turnes (Mirandoflores), Nacho Carnota (violín), Rhome, o Coro de Sondela e Diego Flâneur.
A agrupación noiesa Carabela está formada por Ana Moas, Pablo Agra, Alba V. Burke e Pablo Pazos.
Carabela onstrúe un universo sonoro propio onde conflúen o pop-rock alternativo e a electrónica, con ecos da música tradicional.
Tras a publicación dos EPs Nó (2023) e A noite (2024), co que acadaron o Premio Narf, e do disco de remixes Club A Noite (2025), a banda continúa a consolidar unha traxectoria en ascenso dentro e fóra de Galicia.
Sobre Carabela
Carabela é unha das propostas máis destacadas da nova escena musical galega. A banda, formada por Ana Moas (voz), Pablo Agra (guitarra eléctrica, voz e programacións), Alba V. Burke (sintetizadores) e Pablo Pazos (baixo), constrúe unha identidade sonora propia na que conflúen o pop, a electrónica e a música tradicional.
Carabela ten percorrido algúns dos escenarios máis destacados do panorama musical galego, como o Festival Maré, o Festival de Cans, o Facela Fest, o Osa do Mar ou os emblemáticos Teatro Colón e Sala Capitol. Entre os seus fitos destaca ter acadado o Premio Narf, compartir táboas con referentes como Mercedes Peón e levar o seu directo fóra de Galicia a cidades como León ou Madrid.
O grupo debutou en 2023 co EP Nó, co que foi finalista nos Premios Martín Códax da Música na categoría de Electrónica. En 2024 publica A noite, un traballo no que amplían horizontes sonoros e conceptuais, explorando novas paisaxes dentro do seu universo musical.
Con A noite, Carabela acada o Premio Narf 2024 e inicia unha nova etapa de proxección, que inclúe fitos como a súa colaboración con Mercedes Peón en 2025. Ese mesmo ano publican Club A Noite, un disco de remixes co que revisitan e expanden o seu traballo anterior desde unha perspectiva colaborativa con destacados artistas do panorama da música electrónica en Galicia.
Ao longo de 2025, a banda percorre escenarios como o Festival Maré, o Osa do Mar ou o Festival de Cans. Xa en 2026, presentan varios concertos nun formato máis íntimo en espazos patrimoniais como a Capela de Santa María en Lugo e a Capela do Centro Torrente Ballester en Ferrol, ata desembocar na ría de Noia, onde ofrecerán na súa casa un espectáculo de maior formato rodeados doutros artistas locais.
