Protexer e difundir o legado de Ramón María del Valle-Inclán, unha das grandes figuras da literatura española e unha referencia esencial da cultura galega, profundamente ligado á Pobra do Caramiñal, é o obxectivo da visita que tivo lugar esta semana ao Museo Valle-Inclán da Pobra por parte do presidente da Deputación da Coruña, Valentín González Formoso.
Nesta visita institucional ao municipio, Formoso subliñou a vontade da Deputación de explorar novas vías de colaboración e alianzas co museo para traballar conxuntamente na posta en valor e na proxección da figura de Valle-Inclán, aproveitando para coñecer de primeira man este senlleiro centro cultural.
Dicir que durante o percorrido polas instalacións, Formoso estivo acompañado polo director do museo, Antonio González Millán, polo alcalde da localidade, José Carlos Vidal, e pola concelleira Patricia Lojo. O presidente interesouse polos fondos que alberga o museo, que inclúen pezas orixinais que pertenceron ao autor, documentación, obras bibliográficas e materiais vinculados á vida e á produción literaria de Ramón María del Valle-Inclán.
Engadir que o museo está situado na histórica Torre de Bermúdez, un edificio do século XVI construído entre 1540 e 1545, que constitúe un dos elementos patrimoniais máis salientábeis da vila. Declarada monumento histórico-artístico en 1976, foi rehabilitada entre 1983 e 1987 para acoller o Museo Valle-Inclán, que abriu as súas portas en 1987 e está considerado a institución valleinclaniana decana do país.
En canto á obra de Valle, é definida como innovadora e profundamente persoal, marcou un antes e un despois coa creación do esperpento, un novo xeito de entender a realidade a través da deformación crítica. A súa influencia esténdese tanto á narrativa como ao teatro, converténdoo nun autor clave da modernidade literaria, cunha proxección que transcende fronteiras e continúa plenamente vixente.
O presidente da Deputación fixo fincapé na colaboración da Deputación co centro, que inclúe o financiamento da contratación dunha técnica para a atención ao público cunha achega anual de 20.000 euros, amais do apoio a distintas actividades.
