As comarcas das Rías Baixas e a área de Santiago quedarán este mércores 18 nunha situación meteorolóxica intermedia, influenciadas pola borrasca “Therese” situada ao oeste de Lisboa e polas altas presións sobre o continente europeo.
Este escenario favorecerá a entrada de aire do sueste, deixando unha xornada con abundantes nubes medias e altas. Agárdanse chuvascos, máis probables nas zonas occidentais e especialmente durante a primeira metade do día, podendo ser localmente treboentos.
No que respecta ás temperaturas, as mínimas experimentarán un moderado ascenso, mentres que as máximas tenderán a descender, deixando un ambiente máis suave e algo inestable (máximas de 19-20 graos).
O vento soprará do sueste, frouxo en xeral, aínda que con intervalos de intensidade moderada no litoral e nas zonas máis elevadas.
O xoves 19 día de San Xosé, festivo autonómico, agárdanse ceos con máis nubes na costa, onde mesmo haberá a posibilidade dalgún chuvasco ocasionalmente treboento.
O noso mar: Vento do sueste á mañá, do leste á tarde e do leste á noite, forza 3 a 4 á mañá e á noite e 1 a 3 á tarde. Marusía á mañá e á noite e mar ovellado á tarde. Visibilidade boa. Mar de fondo do noroeste, con ondas de 3 a 4 metros á mañá e á tarde e 2.5 a 3.5 metros á noite.
