A importancia da seguridade e da salubridade dos produtos do mar de Galicia foi posta en evidencia este luns en Santiago de Compostela pola directora do Instituto Tecnolóxico para o Control do Medio Mariño de Galicia (Intecmar), no decurso dunha charla centrada na importancia deses aspectos nos produtos do mar, salientando a realización neste centro de máis de 8.000 mostras anuais.
Os sjstemas de vixilancia e control garanten a calidade e a confianza dos produtos mariños de Galicia, poñendo deste xeito en valor o traballo que desenvolve o devandito centro no seguemento das condicións do medio mariño e no control sanitario das zonas de produción, un labor esencial para asegurar que os mariscos que chegan ao mercado cumpren cos máis altos estándares de seguridade alimentaria.
Paras esta fin lévanse a cabo un promedio de entre 8.000 e 10.000 mostras anuais que recollen o equipo de mostreo do propio Intecmar e os biólogos da Consellería e mesmo polas asistencias técnicas das confrarías. Amáis este instituto emite máis de 6.000 informes ao ano para posibilitar o funcionamento dos plans de xestión marisqueira e unhas 20.000 notificacións de cambios nas zonas de produción de moluscos bivalvos a todos os axentes implicados, atendendo principalmente á situación microbiolóxica e de biotoxinas.
Entre os principais programas de control que realiza o organismo da Xunta figuran o seguemento de biotoxinas mariñas, contaminantes e outros parámetros que poden influir na calidade dos produtos do mar, análises que permiten tomar decisións baseadas en criterios científicos e garantir a protección da saúde dos consumidores. É o caso da miticultura: o mexillón é a estrela das rías galegas, onde permanecen fondeadas 3.337 bateas cunha produción que superou nos últimos anos as 178.000 toneladas, o que supuxo un volume de negocio superior aos 128,5 millóns de euros.
