No pleno da Corporación programado para esta semana, o grupo municipal do BNG de Noia presentará unha moción de urxencia para levar a cabo a mellora dos parques infantís municipais á maior brevidade posíbel.
A xeito de xustificación de urxencia, sosteñen que “coa chegada dos primeiros días de sol, e logo da vaga de borrascas, é un clamor cidadán en Noia que os parques infantís municipais, xa en mal estado previamente, están agora aínda máis degradados. Por isto, cómpre tomar medidas urxentes”.
Proporán habilitar unha partida orzamentaria á maior brevidade posíbel “para a mellora e restauración dos parques infantís do municipio, con máis urxencia o da Alameda, polo seu estado e afluencia, e do do paseo marítimo, pola súa total degradación”.
