Coincidindo coas celebracións do 8M (Día Internacional da Muller), o Auditorio de Ribeira acolleu este luns 9 pola tarde a presentación da proba ciclista La Vuelta Feminina by Carrefour.es 2026. No acto deuse a coñecer o percorrido desta importante cita deportiva e debulláronse as sete etapas que conformarán a próxima edición da competición ciclista.
Durante a cerimonia, retransmitida en directo por Teledeporte, presentouse o trazado da carreira a través dun vídeo explicativo e dun comentario en directo das diferentes etapas. O acto incluíu ademais a proxección dun resumo cos mellores momentos da edición anterior da carreira e dun vídeo sobre o programa de responsabilidade social corporativa La Vuelta es Más.
Na cita participaron numerosas personalidades da política e da deporte, entre outras/os a alcaldesa María Sampedro, o conselleiro de Presidencia, Diego Calvo, os presidentes das deputacións da Coruña, Ourense e Pontevedra (Valentín González Formoso, Luis Menor e Luis López), o director de Turismo de Galicia, Xosé Merelles, o subdelegado do Goberno na Coruña, Julio Abalde, o secretario xeral para o Deporte, Roberto García, o alcalde de Porto do Son, Luis Oujo, ou a delegada territorial da Xunta na Coruña, Belén do Campo.
Segundo informaron, a proba comezará o domingo 3 de maio con Galicia como gran protagonista.
Durante a presentación de La Vuelta Femenina, Diego Calvo destacou a forte tradición ciclista de Galicia e a celebración de probas consolidadas no calendario como La Vuelta e O Gran Camiño. Ademais de recordar que a nosa comunidade conta con algúns dos mellores equipos elite e sub-23 de España, salientou o crecemento do ciclismo feminino nos últimos anos.
La Vuelta Femenina by Carrefour.es volve á Galicia logo de acoller en 2021 a Ceratizit Challenge by La Vuelta, antecedente da actual rolda que, con catro etapas, se disputou daquela integramente na nosa comunidade.
