O Concello de Noia vén de iniciar as obras de mellora do pavimentado e humanización dos Xardíns Felipe de Castro, situados na Alameda de Noia, nunha actuación destinada a renovar un dos espazos máis céntricos e emblemáticos da vila.
O alcalde, Fran Pérez, destacou a relevancia do proxecto, sinalando que “trátase dunha obra na que estivemos traballando dende que chegamos ao goberno, hai seis meses”. O rexedor subliñou que esta intervención, xunto cos traballos de limpeza integral e melloras na contorna e o acondicionamento do Campo da Feira, “van supoñer unha mellora importantísima da imaxe dun lugar tan central para Noia como é o entorno da Alameda”.
Pola súa banda, o concelleiro de Obras, Manolo Siejas, explicou que o investimento ascende a preto de 90.000 euros e está financiado con fondos europeos con cargo ao PSTD (Plan de Sustentabilidade Turística en Destino). Segundo indicou, a actuación permitirá “un tránsito moito máis estilizado entre o casco histórico e a Alameda de Noia, dous puntos fundamentais da vila”.
Desde o Goberno municipal prevese que os traballos estean rematados a finais do mes de abril, coincidindo coa celebración de San Marcos, co obxectivo de que tanto a veciñanza como as persoas visitantes poidan desfrutar dun espazo renovado, máis accesible e mellor integrado na contorna urbana.
