O Real Club Náutico Portosín acolleu a primeira proba do Campionato de España Inclusivo de Moton. ca-Grupo Dávila, unha cita inaugural que destacou por alcanzar unha cifra récord de participación cun total de 17 equipos.
O evento contou ademais coa presenza do secretario xeral para o Deporte da Xunta de Galicia, Roberto García, quen quixo apoiar esta iniciativa centrada na inclusión a través do deporte.
Tras a confirmación de inscricións e a celebración do habitual briefing, no que se explicaron os detalles da competición, os pilotos —acompañados polas súas tripulantes— afrontaron un esixente circuíto tipo slalom entre boias. A proba incluía recollida e depósito de cesta-pelota, manobras de fondeo e captura de cabo con bicheiro, todo iso na lámina de auga situada na bocana do porto deportivo, cun tempo estimado de execución duns catro minutos.
O mellor resultado foi para o tándem vigués formado por José Luís Fernández e Montserrat Pérez, que completaron o percorrido en 4 minutos e 16 segundos, sumando 206 puntos. Moi preto situáronse os lalinenses Cristina García e José Manuel Santiso, a tan só catro segundos, con 210 puntos. O terceiro posto foi para os noieses Joaquín Barrio Guldrís e Joaquín Barrio Bouzas, que quedaron a un só punto dos segundos clasificados.
Durante a súa intervención, Roberto García destacou o labor desenvolvido pola Real Federación Galega de Moton. ca e a Asociación ADECO-DEA en materia de integración, e eloxiou a destreza dos participantes, que deben axustar os tempos sen axuda tecnolóxica e memorizar un circuíto de notable complexidade.
A xornada tamén serviu para a entrega de premios da tempada 2025, tanto a nivel galego como nacional. O título autonómico foi para Pepe Barrio, acompañado durante o campionato por María Barrio e Joaquín Barrio. Pola súa banda, o campionato de España foi para Enrique Dios e María Barrio.
A entrega de galardóns contou ademais coa presenza do concelleiro de Deportes de Concello de Porto do Son, Carlos Lorenzo; o director de deportes municipal, Luís Otero; e representantes do club anfitrión como José Codesido e Fernando González.
A segunda proba puntuable do campionato disputarase o próximo 11 de abril en augas da Ría de Muros e Noia, co Concello de Outes como anfitrión.
