O Concello de Boiro organiza un campamento de conciliación para nenos e nenas de entre 3 e 12 anos durante as vacacións de Semana Santa. A actividade desenvolverase os días 30 e 31 de marzo e 1 e 6 de abril, e as inscricións poderán realizarse a partir do luns 16 de marzo a través da sede electrónica municipal ou do rexistro xeral.
Esta iniciativa está dirixida a menores escolarizados e ten como obxectivo facilitar ás familias un recurso de conciliación con horarios flexibles adaptados ás súas necesidades. Ademais, o programa pretende ofrecer unha alternativa de lecer educativo e integrador para a rapazada durante os días non lectivos.
O campamento desenvolverase nas instalacións do CEIP Santa Baia e contará cun horario flexible, con entrada ás 9:00 ou ás 10:00 horas e saída ás 14:00 horas.
As actividades estarán baseadas en metodoloxías participativas e dinámicas que fomenten a creatividade, o traballo en equipo e valores como o respecto e a solidariedade. O programa estará adaptado ás distintas idades e ás necesidades socioeducativas das persoas participantes, incorporando ademais unha perspectiva non sexista nas propostas educativas.
O campamento contará cun total de 25 prazas. Para a súa adxudicación darase prioridade aos nenos e nenas empadroados no municipio de Boiro, tendo tamén en conta a situación laboral dos proxenitores e a orde de entrada das solicitudes. O custo de participación será de 15 euros por persoa participante.
