Así se desprende do resultado das últimas eleccións autonómicas (as de Extremadura e Aragón) e as previsións que se fan de cara ás do vindeiro domingo en Castela e León. Esta lectura vése reforzada coa demisión, esta fin de semana, do secretario xeral das Novas Xeracións do PP, Carlo Angrisano, quen ao parecer pediu o voto para Vox.
Angrisano, sobriño do eurodeputado por Vox Juan Carlos Girauta, xa non exercía oficialmente como secretario xeral da organización xuvenil do PP desde vai uns meses. Accedera a este cargo en abril de 2021. Graduado en Dereito, foi asesor parlamentario no Parlamento Europeo e na fin de semana confirmou que solicitara o voto para Vox porque as súas ideas “seguen firmes” e os seus principios “inamobibles”.
Este caso confirma a impresión que, dende vai algún tempo, latexa no seo dos “populares” e que transmite a impresión de que as xuventudes “populares” son, arestora, unha base importante para a incorporación a Vox dun voto xove que, ata fai pouco tempo, semellaba estar incardinado na estrutura do Partido Popular.
Segundo as últimas enquisas, Vox é o primeiro partido en intención de voto entre os electores de 18 a 44 anos. De feito, nas mobilizacións levadas a cabo en distintos lugares de España, nomeadamente en Madrid, moitos dos xoves que enarbolaban bandeiras inconstitucionais de España (franquistas) non ocultaban a súa pertenza/militancia en partidos da dereita e extrema dereita.
