A agrupación UCIN Galicia emitiu un comunicado no que lembra que leva tempo alertando do preocupante aumento da delincuencia en toda a comunidade e reclamando, sen ser escoitada, máis efectivos policiais e maiores medios materiais para as forzas e corpos de seguridade. No comunicado din que “os recentes roubos con forza ocorridos en Ribeira —no Centro Social de Carreira, nun bar do centro urbano e en vivendas de Corrubedo— son só un exemplo máis dunha situación que se repite en múltiples concellos galegos e que está a xerar unha crecente sensación de inseguridade entre a cidadanía”.
O coordinador de UCIN Galicia, José Luis Calo, móstrase tallante: “Non se pode seguir mirando cara a outro lado mentres Galicia se enche de roubos, asaltos e vandalismo. A seguridade non é un luxo, é un dereito. Os persoais policiais son insuficientes e os medios materiais están obsoletos en moito casos. Esta situación non se pode soster”, sinala.
Desde UCIN Galicia esíxese ás administracións competentes un plan urxente de reforzo de efectivos, maior presenza policial nas rúas, especialmente en zonas rurais e núcleos costeiros, e un investimento real en recursos técnicos e humanos para garantir a seguridade de veciños, comerciantes e traballadores.
“A cidadanía non pode vivir con medo nin resignarse a que o seu barrio ou o seu pobo estean en terra de ninguén. Esiximos respostas inmediatas e solucións reais, non máis promesas baleiras”, engade Calo.
Lembra que UCIN Galicia continuará denunciando publicamente cada episodio de inseguridade e apoiando os veciños e colectivos afectados ata que se adopten as medidas necesarias para frear esta deriva.
