A formación independente Unión de Cidadáns Independentes (UCIN Boiro), liderada por Miguel Piqueras, realizou unha visita a Pomar do Río e á súa contorna co obxectivo de comprobar sobre o terreo as deficiencias que, segundo denuncian os veciños, levan anos sen solución.
Durante o percorrido, os representantes da formación constataron problemas recorrentes como o desbordamento de augas pluviais, cunetas colmatadas, pistas en mal estado e dificultades de acceso a vivendas e parcelas. Unha situación que, segundo trasladaron os residentes, afecta directamente á seguridade viaria, á mobilidade diaria e á calidade de vida no rural.
Os veciños advertiron tamén do risco de accidentes pola acumulación de auga nas pistas, especialmente en épocas de choiva intensa, e criticaron a falta de actuación continuada por parte do goberno municipal. Desde UCIN Boiro sinalan que “moitas das demandas do rural só reciben atención en períodos electorais”, polo que reclaman “un compromiso real e estable no tempo”.
Propostas concretas e asumibles
Fronte a esta realidade, a formación presenta un plan de actuación inmediato que inclúe a limpeza integral de cunetas para garantir a correcta evacuación das augas, a reparación e mantemento periódico das pistas da parcelaria e a instalación de rexistros e sistemas adecuados de recollida de augas pluviais que eviten acumulacións na calzada.
Así mesmo, propoñen a posta en marcha dun plan estable de mantemento do rural con seguimento público, que permita avaliar periodicamente o estado das infraestruturas e asegurar unha resposta áxil ás incidencias.
“Son medidas básicas, urxentes e perfectamente asumibles polo Concello. Non falamos de grandes obras, senón de planificación, mantemento e compromiso real co rural”, destacou Miguel Piqueras durante a visita.
Compromiso co rural de Boiro
Desde UCIN Boiro subliñan que o abandono das parroquias non pode converterse nunha constante e lembran que o rural “forma parte esencial do municipio e merece solucións reais e duradeiras”.
A formación comprométese a acompañar aos veciños de Pomar do Río e da súa contorna, trasladando as súas demandas ás institucións e supervisando que as actuacións se executen de maneira efectiva.
“Estamos a falar de mellorar a seguridade, a mobilidade e a calidade de vida de todos os veciños. Pomar do Río non pode seguir sendo o gran esquecido do municipio. É hora de actuar e demostrar que o rural tamén importa”, concluíu Piqueras.
